నల్లమల అడవుల్లో ఎలివేటెడ్ కారిడార్ నిర్మాణంలో కీలక అడుగు.. శ్రీశైలం జర్నీ బేఫికర్!
నల్లమల అడవుల్లో ఎలివేటెడ్ కారిడార్ నిర్మాణంలో కీలక అడుగు.. శ్రీశైలం జర్నీ బేఫికర్!
నల్లమల అడవులు ఆంధ్రప్రదేశ్, తెలంగాణ రాష్ట్రాల సరిహద్దుల వెంబడి విస్తరించి ఉన్న ప్రసిద్ధ వన్యప్రాణి అభయారణ్యం. ఇక్కడ శ్రీశైలం మల్లికార్జున స్వామి ఆలయం దర్శనం కోసం వచ్చే భక్తుల సంఖ్య రోజురోజుకూ పెరుగుతోంది. అయితే, ప్రస్తుతం ఉన్న ఘాట్ రోడ్డు పరిమితుల వల్ల భక్తులు తీవ్ర ఇబ్బందులు ఎదుర్కొంటున్నారు. ఈ సమస్యను శాశ్వతంగా పరిష్కరించడానికి కేంద్ర, రాష్ట్ర ప్రభుత్వాలు కలిసి ఒక వినూత్న ప్రాజెక్టును చేపట్టాయి.
పెద్ద దోర్నాల నుంచి శ్రీశైలం వరకు జాతీయ రహదారి-765పై ఎలివేటెడ్ కారిడార్ (ఎత్తైన రహదారి) నిర్మించాలని నిర్ణయించారు. ప్రస్తుతం ఘాట్ రోడ్డులో రాత్రి సమయంలో వన్యప్రాణుల సంచారం కారణంగా ఉదయం 6 నుండి రాత్రి 9 గంటల వరకు మాత్రమే వాహనాలను అనుమతిస్తున్నారు. ఈ ఆంక్షల వల్ల భక్తులు ఎక్కడికక్కడ నిలిచిపోవాల్సి వస్తోంది. అయితే, ఈ ఎలివేటెడ్ కారిడార్ నిర్మాణం పూర్తయితే వన్యప్రాణుల సంచారానికి ఎలాంటి అంతరాయం కలగకుండా, భక్తులు 24 గంటలూ సురక్షితంగా ప్రయాణించే వెసులుబాటు ఏర్పడుతుంది. పైన రహదారి, కింద వన్యప్రాణులు స్వేచ్ఛగా తిరగడానికి వీలు కలుగుతుంది.ఈ ఎత్తైన వంతెనను రెండు రాష్ట్రాల పరిధిలో నిర్మించనున్నారు:
🛣️ జాతీయ రహదారి-765పై ఎలివేటెడ్ కారిడార్
ఆంధ్రప్రదేశ్ వైపు: పెద్దా దోర్నాల నుంచి శ్రీశైలం వరకు 41.39 కి.మీ.తెలంగాణ వైపు: బ్రాహ్మణపల్లి నుంచి శ్రీశైలం వరకు 45.35 కి.మీ.మొత్తం దూరం: సుమారు 86.74 కి.మీ. పొడవున ఈ వంతెన రానుంది.
🦺 వన్యప్రాణి మండలి అనుమతులతో త్వరలోనే పనులు
ఈ ఎలివేటెడ్ కారిడార్ను పూర్తిగా స్తంభాల (Pillars) ఆధారంగా నిర్మించడం వల్ల అటవీ భూమి వినియోగం చాలా తక్కువగా ఉంటుంది. ప్రాజెక్టు పర్యావరణ ప్రభావ అధ్యయనం కోసం భారత వన్యప్రాణి సంస్థ (WII) సహాయం తీసుకున్నారు. వారి నివేదిక ఆధారంగా జాతీయ వన్యప్రాణి మండలి అనుమతులు పొంది త్వరలోనే పనులను ప్రారంభించాలని లక్ష్యంగా పెట్టుకున్నారు. ముఖ్యంగా తుమ్మలబైలు, చిన్నారుట్ల ప్రాంతాల్లో పులుల సంచారం ఎక్కువగా ఉన్నందున వన్యప్రాణుల రక్షణకు ప్రత్యేక జాగ్రత్తలు తీసుకోనున్నారు.
యాత్రికులకు సౌకర్యం.. వన్యప్రాణులకు రక్షణ
నల్లమల వన్యప్రాణి అభయారణ్యం దక్షిణ భారతదేశంలోని అతి పెద్ద అటవీ ప్రాంతాల్లో ఒకటి. ఇక్కడ పులులు, చిరుతలు, ఎన్నో జాతుల పక్షులు, జంతువులు స్వేచ్ఛగా విహరిస్తాయి. ఈ సున్నితమైన ప్రాంతంలో అభివృద్ధి పనులు చేపట్టేటప్పుడు పర్యావరణ సమతుల్యాన్ని కాపాడడం కీలకం. ఈ ఎలివేటెడ్ కారిడార్ నిర్మాణం పూర్తి అయితే శ్రీశైలం యాత్రికులకు ప్రయాణ సౌకర్యం పెరగడంతో పాటు, అడవిలోని మూగజీవాల జీవనానికి ఎలాంటి ఇబ్బంది ఉండదు. ఇది పర్యావరణ రక్షణకు, ప్రాంతీయ అభివృద్ధికి ఒక ముఖ్యమైన మైలురాయిగా నిలవనుంది.